2015-yil 23-fevral kuni Samarqand viloyat hokimligining “Samarqand shahridagi oliy o‘quv yurtlari, o‘rta maxsus, kasb-hunar ta’limi hamda xalq ta’limi boshqarmalari muassasalarining professor-o‘qituvchilari hamda pedagog xodimlari bilan uchrashuvlar o‘tkazish rejasi”ga muvofiq Samarqand davlat chet tillar institutida viloyat xokimi Z.T.Mirzaev, viloyat prokurori B.A.Dehqonov, viloyat IIB boshlig‘i polkovnik F.B.Quvondiqovlarning professor-o‘qituvchilar hamda pedagog xodimlar bilan ochiq muloqoti bo‘lib o‘tdi.
Dastlab, diniy ekstremizmning Iroq Shom islom davlati (IShID)ning islom davlati qurish borasida amalga oshirayotgan vahshiyona harakatlarini fosh etuvchi hujjatli film namoyish etildi.
Yig‘ilishni institut rektori G‘.Raximov ochib, O‘zbekiston Respublikasida hozirgi kunning global muammosiga aylangan diniy ekstremizm, yoshlar o‘rtasida muayyan ma’naviy-ma’rifiy va targ‘ibot ishlarini kuchaytirishni talab etayotganligi, bu borada institut professor-o‘qituvchilari oldida turgan vazifalar to‘g‘risida gapirib, so‘zni viloyat hokimi Z.T.Mirzaevga berdi.
Viloyat hokimi Z.T.Mirzaev so‘zga chiqib, haqiqatan ham bugungi kunning dolzarb muammosi bu yoshlarimizning bilib-bilmay chet ellarga turli bahonalar bilan chiqib ketib, turli oqimlarga qo‘shilib qolayotganliklari, buning oqibatida oilalarda nohushliklar yuzaga kelayotgani, Prezidentimiz ta’biri bilan aytganda O‘zbekistonning kelajagi yoshlarmiz qo‘lida ekanligi ayniqsa, oliygohlarda ta’lim olayotgan talabalar olgan bilimlarini o‘zining mahallasida, qishloqdoshlariga ham etkazib, targ‘ibotchi sifatida bizga ko‘makdosh bo‘lishlari zarurligi, shularni inobatga olgan holda institut talabalariga professor-o‘qituvchilar tomonidan yana bir bora ushbu mavzuda suhbatlar o‘tkazishlari lozimligi to‘g‘risida ta’kidlab, oliy ta’lim muassasalaridan Nomdor stipendiya sohiblari, SamDChTIda o‘rganilayotgan tillar kesimidagi yo‘nalishlarning barchasi yoshlarimizga yaratilayotgan imkoniyatlar ekanligiga alohida to‘xtalib o‘tdi.
Samarqand viloyat prokurori B.Dehqonov so‘zga chiqib, diniy ekstremizm va missionerlik harakatlari butun insoniyatni tashvishga solayotgan eng katta muammolardan biri ekanligi, bu muammo nafaqat, ma’lum bir davlat chegarasida, balki hududsiz, boshqacha qilib aytganda transmilliy jinoyat turiga aylangani va noqonuniy daromad keltiruvchi soha hisoblanishini aytib o‘tdi.
Viloyat IIB boshlig‘i polkovnik F.B.Quvondiqov ham so‘zga chiqib, ko‘pincha o‘z sha’ni, qadr-qimmatini bilmagan yoki mo‘may pul topish ilinjida bo‘lgan kimsalar bunday harakatlarning qurboniga aylanib qolayotgani va bunga xuquqiy savodsizlik ham asosiy omillardan biri bo‘lib qolishini ta’kidlab, O‘zbekiston musulmonlari idorasida islomshunos olimi Aydarbek Tulepovning “IShID fitnasi” nomli kitobida bu kabi muammolar aniq ochib berilganligini bildirdi.
Ochiq muloqot yakunida professor-o‘qituvchilardan Sh.Safarov, R.Shodiev, Ma Su LI, D.Amriddinova, R.Ibragimov, A.Raximovlar viloyatda professor-o‘qituvchilar uchun dam olish sihatgohini qurish, institut atrofida go‘zallik salonlarini tashkil etish, gid-tarjimonlar tayyorlash bo‘yicha alohida yo‘nalish ochish, sport zali va SamDChTI qoshidagi “Konfutsiy” instituti uchun qo‘shimcha bino ajratish kabi takliflari bilan viloyat hokimi Z.Mirzaevga murojaat etishdi va qoniqarli javoblarni olishdi.
Yig‘ilish yakunida professor-o‘qituvchilar ushbu ochiq muloqotdan to‘la qoniqish hosil qilishganligini, bunday tadbirlar tez-tez o‘tkazib turilsa maqsadga muvofiq bo‘lishini ta’kidlashdi.