Joriy yilning 3-dekabr sanasida Samarqand davlat chet tillar institutiga O‘zbekiston Respublikasi Oliy va o‘rta maxsus ta’lim vazirligining 2014 yil 29 noyabrdagi 87-03-1040-sonli modemnomasiga asosan AQSh davlat departamenti matbuot va ommaviy diplomatiya Byurosi Janubiy va markaziy Osiyo mintaqasi bo‘yicha Boshqarma direktori Ketrin Shalou xonim, AQSh elchixonasi Madaniyat va ta’lim maslahatchisi Laura Trevis xonim, AQSh elchixonasi Ingliz tili dasturlari bo‘yicha yordamchisi, axborot, madaniyat va ta’lim bo‘limi xodimi Nodira Meliboevalar boshchiligidagi delegatsiya tashrif buyurdi.
Rasmiy mehmonlarni institut rektori G‘.X. Raximov, ilmiy ishlar bo‘yicha prorektor Sh. S. Ashurov, ingliz filologiyasi fakulteti dekani F.Sh. Ro‘ziqulov, Xalqaro aloqalar bo‘limi boshlig‘i O.Yusupovlar kutib oldilar.
Uchrashuv davomida institut rektori G‘.X. Rahimov institutning tashkil topish tarixi, institutda mavjud fakultetlar, yo‘nalishlar va institutning hozirgi kundagi faoliyati bilan tanishtirdi. Institut tashkil etilgan davrdan buyon ingliz tili institutda asosiy o‘rganilayotgan til sifatida o‘rganilib kelinayotgani, bu borada institut ma’lum darajada bir qancha yutuqlarga erishganligi to‘g‘risida gapirdi. Xususan, chet tillarni o‘qitishda Muhtaram Prezidentimizning 2012 yil 10-dekabrdagi PQ-1875-sonli “Chet tillarni o‘rganish tizimini yanada takomillashtirish chora-tadbirlari to‘g‘risida”gi Qarori ham amalda keng qo‘llanib kelinayotganligini ta’kidladi.
Ketrin Shalou xonim haqiqatdan ham O‘zbekistonda chet tillarni, jumladan, ingliz tilini o‘rganishga alohida e’tibor berilayotgani, hukumatning ta’lim sohasiga, ayniqsa, chet tillarni o‘rganish tizimiga qaratilgan e’tiborini ham alohida ta’kidlash lozimligi xususida to‘xtaldi.
AQSh elchixonasi Madaniyat va ta’lim maslahatchisi Laura Trevis xonim AQSh elchixonasi va SamDChTI o‘rtasida ta’lim, ilmiy va madaniy hamkorlikni yanada rivojlantirish, qo‘shma seminar-treninglar, videokonferensiyalar tashkil etish, hamkorlikda maqolalarni chop etish hamda AQSh universitetlari bilan fan-ta’lim va ilmiy sohalarda hamkorlikni kengaytirish taklifini kiritdi. SHuningdek, AQSH elchixonasi Madaniyat va ta’lim bo‘limi tillarni o‘qitishga oid zaruriy darsliklar va adabiyotlar bilan ta’minlashda yaqindan ko‘maklashishga tayyor ekanligini bildirdi. Kelgusi o‘quv yilida AQSh elchixonasi tomonidan Samarqand davlat chet tillar institutiga kelib, ingliz tili va adabiyoti mutaxassisligi bo‘yicha dars berib, institutda pedagogik faoliyat yuritish uchun ko‘ngilli o‘qituvchi jalb qilish bo‘yicha muzokaralar olib borilayotganligini ma’lum qildi.
Mehmonlar institutning ingliz filologiyasi fakulteti professor-o‘qituvchilari va talabalari bilan ham uchrashib, erkin suhbat olib borishdi.
Suhbat davomida Laura Trevis xonim AQShning Fullbright, US study va boshqa jamg‘armalari tomonidan O‘zbekistonlik talabalar, ilmiy tadqiqotchilar va o‘qituvchilarga taklif etilayotgan grantlar haqida ma’lumot berdi. Talabalarning ta’lim olish sifati samaradorligini oshirish maqsadida AQSh elchixonasi tomonidan kelgusi o‘quv yilida o‘qituvchi ajratilishi kutilayotganligini ta’kidladi.
Suhbat davomida professor-o‘qituvchilar va talabalar AQSh delegatsiyasi tashrifi uchun minnatdorchilik bildirgan holda o‘zlarini qiziqtirgan savollarga javob olishdi. Jumladan:
- Talabalarga ingliz tilini o‘rganish davomida duch kelinayotgan muammolar;
- Ingliz tilini qisqa fursat ichida o‘rganish metodikasi va usullari;
- AQSh hukumati va elchixonasi tomonidan ajratiladigan ta’lim grantlarini qo‘lga kiritish tartibi va shartlari;
- Kelajakda AQSh oliy ta’lim muassasalari va SamDChTI o‘rtasida hamkorlik aloqalarini o‘rnatish, talabalar va o‘qituvchilar almashinuv dasturlari, ta’lim, ilmiy va madaniy sohalarda hamkorlikni yanada rivojlantirish masalalari yuzasidan qizg‘in suhbatlashishdi.
Uchrashuv so‘ngida mehmonlar Samarqand davlat chet tillar institutiga qilgan tashrifidan mamnun ekanligini e’tirof etishdi.